جو کسی موڑ پر ٹہر جاؤں
راستہ پوچھے گا کدھر جاؤں
سامنے فروسٹ کا ہے دو راہہ
میں ادھر جاؤں یا ادھر جاؤں
راستہ دے رہا ہے آج فلک
سوچتا ہوں کہ اپنے گھر جاؤں
قفسِ بے فصیل ہے یعنی
شہر ہی شہر ہے جدھر جاؤں
زرد پتوں کا قافلہ ہوں میں
کب بہار آئے کب بکھر جاؤں
شکلِ معدوم پر نگاہِ وجود
آج منظور ہے کہ کر جاؤں
یہ مرا عکس ہے کہ یہ میں ہوں
توڑکر آئینہ نہ ڈر جاؤں
یاد کا بے کنار دریا ہے
کشتئ وقت سے اتر جاؤں
میں تری یاد میں جو جیتا ہوں
بھول سکتا نہیں کہ مر جاؤں
جانتا ہوں کہ خواب ہے اسرار
اس حقیقت سے بے خبر جاؤں
jo kisi moD par thahar jaaoN
raasta pooche ga kidhar jaaoN
saamne Frost ka hai do-raaha
maiN idhar jaaoN ya udhar jaaoN
raasta de rahaa hai aaj falak
sochta hooN ke apne ghar jaaoN
qafas e be-faseel hai yaani
shehr hi shehr hai jidhar jaaoN
zard pattoN ka qaafilaa hooN maiN
kab bahaar aaye, kab bikhar jaaoN
shakl e ma’doom par nigaah e wujood
aaj manzoor hai ke kar jaaoN
ye mera aks hai ke ye maiN hooN
toDkar aaina na Dar jaaoN
yaad ka be-kinaar daryaa hai
kashti e waqt se utar jaaoN
maiN teri yaad meiN jo jeeta hooN
bhool sakta nahi ke mar jaaoN
jaantaa hooN ke KHaab hai Asrar
iss haqeeqat se be-KHabar jaaoN